| Janvier 2012 | ||||||||||
| L | M | M | J | V | S | D | ||||
| 1 | ||||||||||
| 2 | 3 | 4 | 5 | 6 | 7 | 8 | ||||
| 9 | 10 | 11 | 12 | 13 | 14 | 15 | ||||
| 16 | 17 | 18 | 19 | 20 | 21 | 22 | ||||
| 23 | 24 | 25 | 26 | 27 | 28 | 29 | ||||
| 30 | 31 | |||||||||
|
||||||||||
Aprédavwa Trinidad éliminé adan wout-la ka menné a lakoup di mond, ékip-lasa ka éséyé woufè kò a-y. Pwochen òbjètif a-y sé koup "Digicel" a Karayib-la ola i ké éséyé kalifryé-y pou Gold Cup a CONCACAF pou lanné 2013-la. Mé avan Trinidad ka komansé kanpagn a-y èvè on match zanmi kont ékip nasyonal Fenland. Malérèzman pou-y, i pèd fil a-y padavwa i pèd 2-3. Mé i pa démérité!
Claudio Beauvue ni on
sèl sélèksyon èvè ékip
nasyonal Gwadloup, sété
an 2008 kont Senvensan é
Grènadin (1-2)
Adan paj a èspò a "France-Antilles" jòd-la, Claudio Beauvue ka palè asi klèb a-y ES Troyes AC an Fwans. Apré, jounalis-la ka mandé-y pouki biten sé klèb-la pa ka lagé-y fasilman pou'y pé sav jwé ba ékip nasyonal-la. Claudio Beauvue réponn sélèksyon Gwadloup mal òganizé. Yo pa ka sanblé sé jwè-la pli souvan, pon match amikal pa'a fèt osèryé. E i ka di an plis, toutlè sélèskyon-la ké maché an kouyonnad, pon klèb pwofésyonèl fwansé ké pwan ékip-lasa osèryé.
Nou pé pa ba ti-boug-lasa tò! Mé mwen an ké mété an plis, Gwadloup pa adan laFIFA é nou sav sé on pwoblèm politik. Konm gwadloupéyen pa anvi viv adan on péyi alò...
Antrè lanné pasé é jòd-la, sé ti-boug Gwada-la pèd 11 plas. Fòt a ki biten? Fòt a mank match préparasyon pou Gold Cup-la é fòt osi a on mové rézilta adan menm Gold Cup-lasa.
Gwoup A Gwoup B Gwoup C
Etazini Mèksik Ondiras
Jamayik Kòstarika Kiba
Gwatémala Salvadò Panama
Antig é Bawbouda Giyana Kanada
. Lédé prèmyé ka kalifyé-yo pou faz ègzagonal-la ola kay sòti twa kalifyé dirèk pou faz final a lakoup di mond é on barajis.
Ayiti ki jwé lakoup di mond an 1974 é Trinidad ki li kant a-y jwé-y an 2006 éliminé gwan bonnè! Adan prèmyé tou éliminatwa a zòn CONCACAF-la, Ayiti tonbé douvan Antig (0-1) é Trinidad li, pèd fil a-y douvan Giyana 1-2. Avan dènyé jouné-la, Ayiti é Trinidad pé ké rivé jwenn prèmyé plas a poul a-yo.
Trinidad dèpi lakoup di mond 2006 é Gold Cup 2007 poko rivé jwenn pon faz final a on gwan konpétisyon. I pa kalifyé-y pou lakoup di mond 2010 é osi pou Gold Cup 2009 é 2011. Foutbòl a sélèksyon-la an kriz!
Gwadloup - Syéra Léòn ki té dwèt jwé jou 15 novanm pé ké fèt ankò. Poukisa? Sé padavwa ajan a laFIFA ki òganizé match a Syéra Léòn douvan Gana é ékip an-nou, pa touvé lajan.
Sa maléré vwè sitiyasyon kon sa! Nou ka èspéré biten kon sa pé ké fèt ankò!
Sèlon Steeve Bizasène antrénè a sé ti-boug Gwada-la, sanblé a sé pwo-la ké fèt lanné pwochenn. Koup Digicel a Karayib-la ka pati toutalè!
GWADLOUP SYERA LEÒN
Aprédavwa ékip nasyonal Gwadloup anba Steeve Bizasène jwé prèmyé match a-y douvan Antig é Bawbouda (0-0), i kay férayé an vant a bèt-la an Fwans èvè ékip nasyonal a Syéra Léòn. On ékip Syéra Léòn ki pa rivé kalifyé-y pou koup dafwik 2012-la. Konm Syéra Léòn kay jwé on prèmyé match sanmdi douvan Gana, nou pé sipozé match-la douvan ékip an-nou sé ké pou simenn pwochenn (nòmalman mawdi oben mèkrèdi). On ékip Syéra Léòn, 63èm nasyon FIFA.
Nou ka tou konpwann match-lasa ké fèt èvè jwè pwofésyonèl an-nou. On match ki kay fèt an vil Sarcelles ola ou ni onlo gwadloupéyen ka rété la. On bèl galo antrènman pou koup Digicel a Karayib-la!
ANTIG E BAWBOUDA GWADLOUP
0 0
0-0 sé mak a kontré entènasyonal ki té ka sanblé Gwadloup é Antig sanmdi pasé an vil St-John's (Antig). On rézilta entérésan padavwa Antig sé yonn adan sé sélèksyon-la ki anfòm andidan CONCACAF-la. Dayè i kay jwé kalifikasyon a-y pou pwochen tou a éliminatwa a lakoup di mond douvan Ayiti. Pou lèmoman Antig prèmyé adan poul a-y douvan Ayiti. 0-0 sé on bèl rézilta ba sé ti-boug Gwada-la, menm si yo té pé gannyé match-la 4-0 sèlon kapitèn a-yo Jean-Luc Lambourde. Sa ki manké nou an match-lasa sé éfikasité.
Sanmdi pwochen, antrénè-la Steeve Bizasène kay sanblé jwè ka woulé an Ewòp pas pa jen obliyé ékip-lasa ka paré-y osi pou koup Digicel a Karayib-la é pou pwochen Gold Cup a laCONCACAF si'y ka kalifyé-y. On sanblé ki kay fèt an vant a bèt-la an Fwans ola sé ti-boug Gwada-la ké bouwé èvè Syéraléwòn an vil Sarcelles. On ékip Syéra Léòn ki pa kalifyé-y pou koup dafwik 2012-la.
Match entènasyonal amikal :
05/11/11 : Antig é Bawbouda - Gwadloup 0-0
Ekip-la : Olol - Valmy, Lambourde (kap), Siar, Babel - Rambojan, Sévérin, Bérald, Bacould - Mocka, Gotin.
Ekip nasyonal Gwadloup kay fè rantré a-y pou nouvo sézon-la. Nou pa sav si
ékip-la ké fasadé èvè ékip nasyonal Mali mé dèmen sé ti-boug Gwada-la kay kontré èvè ta Antig an péyi Antig menm. E sé kon sa nouvo antrénè-la misyé Steve Bizasène kriyé pou match amikal-lasa
enki jwè lokal.
Antig é Bawbouda ki ka préparé tou éliminatwa a lakoup di mond. Pou lèmoman, i prèmyé adan poul a-y douvan Ayiti. I kay jwé dayè kalifikasyon a-y pou pwochen tou-la adan on match alé-rètou èvè Ayiti menm. Sèl prémyé-la ka kalifyé-y.
Match entènasyonal amikal : Antig é Bawbouda-Gwadloup (9PM)
Sé jwè-la :
Gòl : Christophe Olol (USR)
Marc Otrante (Red Star)
Aryè : Jérémy Valmy (CSM)
Mathias Babel (AJSS)
Félix Siar (CSM)
Manuel Serman (Racing BT)
Heindrick Valerin (Racing BT)
Jean-Luc Lambourde (Amical Club MG)
Christopher Bolmin (CSM)
Dèmi : Fabien Bérald (CSM)
Wilhem Sévérin (JSVH)
Dimitri Fautrai (Phare)
Minnji Gomez (CSM)
Joham Rambojan (Evolucas)
Teddy Bacoul (Gauloise)
Avan : Ludovic Gotin (Phare)
Dominique Mocka (Gauloise)
Thomas Grava (Evolucas)
Antrénè : Steve Bizasène
Dènyé kontré a-yo :
01/12/10 : Gwadloup - Antig é Bawbouda 1-0 (Digicel Cup)
An bout a simenn-la, nouvo antrénè a ékip nasyonal Gwadloup, misyé Steeve Bizasène rantré an fonksyon. I sanblé sanmdi jwè asi Ganntè é yè dimanch, jwè asi Bastè. I sanblé plis ki 50 jwè lokal pou'y komansé vwè ki moun adan yo ké pé pwan plas adan ékip nasyonal-la. On dòt sanblé ké fèt an bout a mwa-lasa é la, misyé Steeve Bizasène ké ni on lidé asi ékip-la i kay mèt an plas.
Lagwadloup tini dé échéyans pou lanné pwochenn. Koup "Digicel" a sé nasyon Karayib-la ola faz final ké jwé an juiyé é koup DOM-TOM ki ké jwé an sèktanm an vant a bèt-la.
Nou sav Steeve Bizasène èvè tout rèstan èstaf tèknik-la ka préparé on sélèksyon osèryé pou Gold Cup a CONCACAF 2013-la.
Dayè jou sanmdi 12 novanm, sé ti-boug Gwada-la kay fasadé èvè ékip nasyonal Mali adan on match zanmi ki kay jwé adan èstad La courneuve Paris. On ékip Mali ki ni adan-y Frédéric kanouté avan a FC Seville (Èspagn) é Seydou Keita dèmi a FC Barcelone (Èspagn). On ékip Mali ki kalifyé pou koup a sé nasyon afwikenn-la ki kay jwé lanné pwochenn an péyi Gabon é an péyi Giné Ekwatoryal. Gwadloup-Mali, on match nou pa dwèt manké an pon jan!
Sa
fèt! Jòd-la, Lig Foutbòl Gwadloup (LGF) nonmé nouvo sélèksyonnè a ékip nasyonal Gwadloup. Non a-y Steeve Bizasène. I ka pwan plas a Roger Salnot. Steeve Bizacène ansyen jwè a CSM é ansyen
entènasyonal gwadloupéyen (i té jwé Digicel a Karayib-la an 2007). Lanné-lasa i té menné ékip jinyò a Lagwadloup adan tounwa kalifikatif pou koup di mond-la an péyi Gwatémala.
An nou èspéré èvè misyé Bizasène, kouran-la ké pasé myé èvè sé jwè pwo-la, ké tini on méyè disiplin é piplis nou gannyé bon rézilta.
Lig Foutbòl Gwadloup(LGF) ni on tou a 400 000 éwo é moné padavwa onlo klèb Gwadloup an défisit. Ki fè misyé Guy Roch ki sé mèt a mannyòk a LGF-la désidé klèb ka douwé Lig
Foutbòl Gwadloup pé ké jwé chanpyona.
Alò konmen klèb nou ké touvé adan chanpyona nasyonal-la? Dis, Huit, sis? Nou ké la pou nou vwè.
Aprédavwa Gwadloup manké Gold Cup a-y, prézidan a Lig Foutbòl Gwadloup
désidé fò sélèksyon-la chanjé antrénè. Misyé Wojé Salnot té an tèt a sélèksyon dèpi 2001. I menné ékip nasyonal Gwadloup an dèmifinal a Gold a CONCACAF-la an 2007 é an kadèfinal a menm
konpétisyon-la an 2009. I menné osi Lagwadloup an final a koup Digicel Karayib-la an 2010 Matnik. Malérèzman i échwé an 2011 pou Gold Cup-la. Misyé Wojé Salnot té ja anonsé Gold Cup-lasa té ké
dènyé ripaj a-y. Echèk a Lagwadloup akséléré mouvman-la. Alò ki moun pou pwan suit a Salnot an tèt a ékip nasyonal Gwadloup? Moun ka anonsé ajwen a-y Jocelyn Angloma, dòt ka anonsé antrénè a CSM
misyé Richa Albert. Jis a jòdi-jou, nou poko savé.
Ki moun pou pwan suit a Salnot? Angloma?
Ekip nastyonal Mèksik kochi ankò on fwa bèk a sé mériken-la. Apré on 5-0 an 2009, Mèksik gannyé final a édisyon 2011-la 4-2 an vil Los Angeles. Tousa èvè on bèl bi a Jiovanni Dos Santos.
Sé sizyèm fwa Mèksik ka ralé Gold Cup-la. I ka kalifyé-y pou pwochen koup a sé konfédérasyon-la ki kay jwé an 2013 an péyi Brézil.
GOLD CUP A CONCACAF AN PEYI ETAZINI
FINAL-LA :
25/06/07 : Adan èstad Pasadena (Los Angeles) :
Etazini - Mèksik 2-4
Bi : Bradley (8èm), Donovan (23èm) pou Etazini. Barrera (29èm, 50èm), Guardado (36èm), Dos Santos (76èm) pou Mèksik.
* Mèksik chanpyon a laCONCACAF 2011 é ka kalifyé-y pou koup a sé konfédérasyon 2013 an péyi Brézil.
Javier "Chicharito" Hernandez (Mèksik) ka bout méyè bitè a Gold Cup-la èvè 7 bi é an menm balan-la éli méyè jwè a konpétisyon-la.
Klasman a sé nasyon-la : 1. Mèksik, 2 Etazini, 3. Panama, 4. Ondiras, 5.Jamayik, 6. Kòstarika, 7. Salvadò, 8. Gwatémala, 9 Kanada, 10. Gwadloup, 11. Grènad, 12. Kiba.
Palmarès-la
1991 : Etazini
1993 : Mèksik
1996 : Mèksik
1998 : Mèksik
2000 : Kanada
2002 : Etazini
2003 : Mèksik
2005 : Etazini
2007 : Etazini
2009 : Mèksik
2011 : Mèksik
Chicharito oben Dempsey?
Mèksik - Etazini, sé ké senkyèm fwa yo kay fasadé an final. Mèksik gannyé twa! Dènyé fwa sété an 2009, Mèksik té krazé Etazini...5-0! Alò Mèksik ké favori pou final a dèmen sanmdi an vil Los Angeles. Jwè klé a Mèksik sé ké natirèlman Javier "Chicharito" Hernadez ki méyè bitè a tounwa-la èvè 7 bi. Ta ékip nasyonal Etazini ké Clint Dempsey ki ja maké twa bi é ki té désizif douvan Jamayik an kadèfinal é Panama an dèmifinal. Jwé boul a-zòt!
GOLD CUP A CONCACAF AN PEYI ETAZINI
FINAL-LA
25/06/11 : adan èstad Pasadena (Los Angeles)
Etazini - Mèksik (6 PM)
Kontré yo fè adan listwa :
1993 : Mèksik - Etazini 4-0
1998 : Mèksik - Etazini 1-0
2007 : Etazini - Mèksik 2-1
2009 : Mèksik - Etazini 5-0
Ki jan yo rivé an final?
Mèksik
Mèksik - Salvadò 5-0
Mèksik - Kiba 5-0
Mèksik - Kòstarika 4-1
1/4 F : Mèksik - Gwatémala 2-1
1/2 F : Mèksik - Ondiras 2-0 apré pwol.
Etazini
Etazini - Kanada 2-0
Etazini - Panama 1-2
Etazini - Gwadloup 1-0
1/4 F : Etazini - Jamayik 2-0
1/2 F : Etazini - Panama 1-0