On match pèd pou komansé

Adan préparasyon ay pou pwochen CONCACAF Gold Cup-la, sé ti-boug Gwada-la komansé èvè on match pèd. Avèsè ay pa té ékip nasyonal Kongo mé on sélèksyon a Il dè Fwans. Pou ki a pa té Lèkongo? Sé padavwa ékip afwikenn-la pa rivé ni paspò pou sé jwè-la pé sav vin jwé pou dimanch. Mé sa pa on pwoblèm ban nou. Sa ki enpòtan sé jwè-la gannyé labitid jwé ant  yo. Magré sé "gwadaboyz"-la dominé tout mach-la, yo rivé pèd 2-1. Bi a Lagwadloup, sé jwè a Neuchâtel an Suis Alexandre Alphonse ki maké-y. Pwochen match a ékip nasyonal Gwadloup sé madi douvan SM Caen adan èstad Malherbe. Mi ékip-la ki jwé dimanch:
Grandel - Comminges (R.Zubar), Phibel, Chimbonda, Quistin - Loval, Bamba (Silvestre), Fleurival, Loizeau (Racon) - Alphonse, Valérius.
Ankò on fwa a pa rézilta ki enpòtan mé kè sé jwè-la ni labitid kontré é jwé ansanm davwa fò nou paré pou Gold Cup-la ki ké jwé an mwa juiyé-la.