Chimbonda ni plas ay adan lis-la?

Pascal Chimbonda
(Tottenham Hotspur (Anglètè)),
jwé dé match zanmi èvè Lagwadloup
adan vant a bèt-la.

Omoman misyé Roger Salnot ké konpozé lis ay-la pou CONCACAF Gold Cup-la, i ké mété bon enpé jwè gwadloupéyen ki ka woulé an péyi déwò. E adan yo, asiré pa pétèt i ké mété Pascal Chimbonda anlè lis-la. Mé ès vré jwè a Tottenham (D1 anglé) ni plas ay asi lis-la? Wi! Davwa sé on jwè ki adan on gwan klèb é ki pòté on fwa mayo a sélèksyon fwansé. Mé apré davwa moun vwè sa'y bay adan lé dé match zanmi an vant a bèt-la (2 match Lagwadloup pèd 2-1 é 1-0),  nou pé mandé nou onlo biten. Ès misyé pé ké fè nou pèd adan Gold Cup-la? Plas ay sé aryè dwa menm si'y té vlé jwé défansè santral. Mé nou tout vwè misyé pa tini randman adan pòs-lasa. Plas ay sé vrèman aryè latéral. Sé plas-lasa i ka jwé an klèb. Pou sélèksyon-la, ni dòt jwè pou pòs a défansè santral! Mwenmenm, an ka kwè Salnot ké pwan-y mé i péké mété-y titilè. Asi koté dwa a défans an nou, sé Michaël Tacalfred (Stade Reims L2 Fwans) ki ka jwé la. Sé misyé ki ké titilè. Fò Chimbonda mété-y sèryé lè'y ka pòté mayo a ékip nasyonal an nou. A pa padavwa ou jwé an ékip nasyonal fwansé, ou ka konpwann plas-la pou vou! Fò'w goumé kon tou lézanmi pou gannyé plas aw! Ni on pakèt jwè ki paré pou jwé Gold Cup-la, alò an ka kwè, vou Chimbonda fò'w goumé!