Ki moun ki ni rèkò a sélèksyon an ékip nasyonal Gwadloup?

Ès sé Alain Vertot
ki ni rèkò a sélèksyon
an ékip nasyonal Gwadloup?


An moman otila ékip nasyonal an nou Gwadloup ka fè palé dè-y dè plis an plis asi latè davwa i kay jwé dézyèm Gold Cup ay lanné-lasa, pon moun pa sav ki jwè ni rèkò a sélèksyon! Nou konnèt ta ékip nasyonal fwansé ( jwè gwadloupéyen Tiram èvè 112 sélèksyon) mé pou ékip Gwadloup, nou pa tini pon chif. Lig foutbòl an nou pa ka fè archiv? Sa domaj! Ekip an nou komansé fè-y on non alò an ka kwè i ja lè pou nou archivé. Dayè sé sa an komansé fè èvè dé otwa dòt gwadloupéyen ki asi dòt blòg. Si nou ka pwan on jwè kon Alain Vertot. Misyé komansé jwé an ékip Gwadloup dèpi 1991. Si an ka konté tout match Lagwadloup fè dépi lanné-lasa, Alain Vertot té ké ni omwen 80 sélèksyon. Ès sé li ki ni rèkò-la? Prèmyé match a Lagwadloup adan listwa sé té adan lé lanné 30. Sé vré an tan-lasa, sa té pli rèd pou fè archiv. Mé kan menm! Nou pa ni archiv asi tout match a Lagwadloup, nou pa ni lis a tout jwè ki té entènasyonal. Komen match yo jwé? komen bi yo maké ba Lagwadloup? Sèl archiv nou pé tini, sé asi sit étranjé mé sé archiv-la pa konplé. Ankò on fwa, sa domaj kè lig an nou pa ni archiv pou'y té sav voyé-y asi entènèt pa èkzanp.