Etazini é Mèksik an final ankò!

Etazini - Mèksik, sé ké afich a final a CONCACAF Gold Cup 2009-la. Sé té osi afich a ta 2007-la. Ankò on fwa Etazini é Mèksik ka maké siprémasi a yo adan konpétisyon-lasa. Etazini kay jwé 7 èm final ay (1991, 1993, 1998, 2002, 2005, 2007, 2009) pou 4 viktwa (1991, 2002, 2005, 2007). Mèksik li kant ay kay jwé 6 èm final ay (1993, 1996, 1998, 2003, 2007, 2009) pou 4 viktwa osi (1993, 1996, 1998, 2003). Sa kay fè 4 èm final otila Etazini kay bouwé èvè Mèksik. An 1993 an vil Mexico, Mèksik té pliché Etazini 4-0, an 1998 an vil Los Angeles, Mèksik té gannyé 1-0 é an 2007 an vil Chicago, Etazini té gannyé 2-1. Adan listwa a Gold Cup-la, Etazini kontré 4 fwa Mèksik. Etazini é Mèksik bita-bita 2-2. Pou yo té sav rivé an final, Etazini gannyé san pon kalté pwoblèm Ondiras 2-0. Clarence Goodson é Kenny Cooper maké sé bi-la adan fen a chak mitan. Mèksik kontré plis difikilté pou'y té sòti Kòstarika. Sé Guillermo Franco ki maké prèmyé bi a match-la pou Mèksik (88 èm) mé malérèzman ba sé mèksiken-la Kòstarika maké bi égalizatè-la adan sé arèjé-la gras a Froylan Ledzema (90+3 èm). Sé pwolongasyon-la pa bay ayen é sé kon sa Mèksik gannyé Kòstarika 5 ti obi a 3. Dimanch an vil New-York kay jwé siprémasi a zòn CONCACAF-la èvè Etazini é Mèksik ki ni 4 Gold Cup a yo chak.

                                                                              DÈMIFINAL

23/07/09 : an vil Chicago : Etazini - Ondiras 2-0
                                          Bi : Clarence Goodson (45 èm), Kenny Cooper (90 èm) ba Etazini.

7 èm final ba sé mériken-la


23/07/09 : an vil Chicago : Mèksik - Kòstarika 1-1 ap.pwo. (5 ti obi a 3).

Mèksik té bizwen séri a pénalti
pou'y té gannyé Kòstarika.


                                                                              FINAL-LA
                                                  26/07/09 : an vil New-York : Etazini - Mèksik

Klasman a sé bitè-la : 1. Miguel Sabah (Mèksik)....4 bi, 2. Blas Perez (Panama)....3 bi...