Gwadloup pa pèd fil aw douvan Ayiti!

                                                           DIGICEL CARIBBEAN CHAMPIONSHIPS 2008



                                                                                 GWOUP B

Jòd-la, ékip nasyonal Gwadloup kay jwé on match enpòtan douvan Ayiti. On match fò pa nou pèd davwa si nou pèd li nou ké jwé Antig pou lonè é apré nou ké rantré a kaz an nou. On nil ké lésé nou atann dènyé match-la a gwoup B-la ki ké fèt ant Kiba é Ayiti. Alò sé boug a Salnot-la sav sa yo ni pou fè. Mé èvè ki ékip? Sèlon kamo mwen tann, yo té ké gadé kolòn vètébral a ékip-la, ki vlé di Grandel-Vertot, Avinel-Auvray, Fleurival-Antoine Curier. Asi koté Lina té ké fè rantré ay an défans, Gendrey té ké titilè an milyé-la é Nabab té ké èvè Antoine-Curier douvan-la. Kèlkanswa ékip-la, nou oblijé gannyé match-lasa. On match ki ké rèd kon match a jédi-la douvan Kiba davwa sitiyasyon a  Ayiti kon ta Gwadloup.  Apré i té fè nil douvan Antig, i oblijé osi gannyé pou'y asiré divini ay.

                                                                     Pwonòstik an mwen pou ékip-la
                                                                                    
                                                                                    1. Grandel

                            2. Lina                     12. Avinel                       6. Vertot (kap)                     18. Quistin

                           17. Hanany               10. Fleurival                  8. Auvray                             14. Gendrey

                                                                 7. Nabab                       11. Antoine-Curier

Asi lòt match-la, si Kiba gannyé match-la aprémidi-la douvan Antig  i ka kalifyé-y pou dèmifinal-la é an menm balan-la pou CONCACAF Gold Cup 2009-la.

                                                                              Dékatman a jòd-la
Sanmdi 6 désanm : Trelawny : Kiba-Antig é Bawbouda (a 1è dè laprémidi)
                                                         Ayiti-Gwadloup (a 3è dè laprémidi)

                                                                                       GWOUP A
Trinidad é Tobago kay férayé èvè péyi òganizatè-la ki sé Jamayik dèmen dimanch Trelawny. Pou'y kalifyé fò'y gannyé Jamayik é konté asi rézilta a Grènad-Bawbad.
Jamayik kant ay ja près kalifyé, i bizwen sèlman on nil pou'y pé pasé. Dayè i pé menm pèd dèmen si Grènad pa ka krazé Bawbad davwa Jamayik ni on bon gòlavéraj (+3).
Grènad li, oblijé gannyé Bawbad èvè onlo bi si'y bizwen kalifyé mé sa ké rèd ba'y. Babwad ni on ti-chans. Pou'y té pasé, fò'y gannyé Grènad èvè onlo bi é èspéré Jamayik gannyé Trinidad.

                                                                                    Dékatman a dimanch
Dimanch 7 désanm : Trelawny : Grènad-Bawbad (a 1è dè laprémidi)
                                                          Jamayik-Trinidad é Tobago (a 3è dè laprémidi).