Kiba, Grènad, Jamayik kalifyé, ka rété yonn!

Adan rézilta a weekend-la ki pasé-la, twa ékip gannyé plas a yo pou sé dèmifinal-la é an menm balan pou CONCACAF Gold Cup-la ki kay fèt lanné pwochenn Kanada. Non a yo, Kiba, Grènad é Jamayik. Ka rété on dènyé plas pou pwan é plas-lasa kay jwé ant Gwadloup, Ayiti é Antig.

                                                                                        GWOUP B
Kiba asiré kalifikasyon ay é Gwadloup fè-y pè toubòlman.
Adan match a sanmdi, Kiba pa twouvé pon kalté pwoblèm pou'y té fouté Antig é Bawbouda. Gras a Marquez, Linares é Colomé adan prèmyé mitan-la, Kiba gannyé plas ay pou dèmifinal-la é an menm balan-la pou Gold Cup 2009-la.

Kiba an blan, asiré san pon kalté
pwoblèm plas ay pou pwochen
Gold Cup-la.

Sanmdi 6 désanm : Trelawny : Kiba-Antig é Bawbouda 3-0
                                                  Bi : Marquez (7è), Linares (20è), Colome (35è) pou Kiba.


Adan lòt match a jodi-la, sé ti-boug Gwada-la raché on viktwa douvan Ayiti. Gwadloup té byen komansé èvè 2 bi maké adan  prèmyé kadè-la. Mé apré sa olyé Gwadloup té kontinwé jwé, i kyoulé é sé kon sa Ayiti woukolé Gwadloup. Toudabò asi on pénalti ki pa té pénalti é  dézyèman asi on érè a plasman a aryè latéral dwat an nou. E sé lè Ayiti wouvin a 2-2, nou vwè Gwadloup monté pli ho é gras a Lambourde nou rivé gannyé match-lasa 3-2 adan dènyé minit a match-la. On viktwa ki ka pèmèt sé tiboug Gwada-la twouvé dézyèm plas-la é pou nou kalifyé on nil ka sifi jòd-la douvan Antig é Bawbouda.

Mickaël Niçoise (20) ki ka jwé Neuchâtel
Xamax an Suis, maké on bèl bi douvan Ayiti.


Sanmdi 6 désanm : Trelawny : Gwadloup-Ayiti 3-2
                                                  Bi : Antoine-Curier (14è), Niçoise (17è), Lambourde (90è) pou Gwadloup.
                                                         Boucicault (45è), Ednerson (68è) pou Ayiti.

Gwadloup : 1. Grandel - 3. Laurence, 12 Avinel, 6 Vertot (kap), 18 Quistin - 20 Niçoise (13 Lambourde), 8 Auvray (15 Vanoukia), 10 Fleurival, 17 Hanany (14 Gendrey) - 7 Nabab, 11 Antoine-Curier.
Ayiti : Clorvin - Gilles, Germain, Jerôme, Ricardo - Boucicault, Saint-Preux, Bruny, Watson (Marcellin), Norde - Raymond, Markorel.

                                                                                  Klasman a gwoup B-la
                                                            1. Kiba 6 pwen (+4)
                                                            2. Gwadloup 3 pwen (0)
                                                            3. Ayiti 1 pwen (-1)
                                                            4. Antig é Bawbouda 1 pwen (-3)
* Kiba kalifyé-y pou sé dèmifinal-la é pou CONCACAF Gold Cup 2009-la.

                                                                                 Pwochen jouné-la
Lendi 8 désanm : Montego Bay : Ayiti-Kiba (a 5è dè laprémidi)
                                                           Gwadloup-Antig é Bawbouda (a 7è dè laprémidi)



                                                                                                   GWOUP A
Grènad ki té éliminé Matnik (zò ka sonjé!) adan faz kalifikatif-la Zabim, kréyé on manman sirpriz. Grènad pété zongòn a Bawbad 4-2 é sé kon sa i éliminé Trinidad é Tobago ki té adan dènyé koup di mond-la an Almagn. Sé vré kè Trinidad pa té vin èvè tout jwè ay mé kan menm!  Trinidad é Tobago kay raté twazyèm Gold Cup ay adan listwa apré 1993 é 2003. An té di sa! Grènad té ké sirpriz a tounwa-lasa padavwa an té vwè yo jwé Zabim alò finalman sa nòmal nou twouvé yo a nivo-lasa. Grènad kay jwé prèmyé Gold Cup ay adan listwa ay.

Magré 2 bi a Bawbad, Grènad an
jòn é wouj kay jwé prèmyé Gold
Cup ay adan listwa ay.

Dimanch 7 désanm : Trelawny : Grènad-Bawbad 4-2
                                  Bi: Bain (14è, 28è, 67è), Julien (22è) pou Grènad.
                                        Riviere Williams (71è, 79è) pou Bawbad.



Adan lòt match a gwoup A-la, Jamayik san pon kalté pwoblèm pwan prèmyé plas-la apré davwa i fè bitabita èvè Trinidad é Tobago 1a 1.

Magré bon goumé a Seon Power (16),
Trinidad é Tobago éliminé adan Digicel-la.

Dimanch 7 désanm : Trelawny : Jamayik-Trinidad é Tobago 1-1
                                                     Bi : Vernan (46è) pou Jamayik.
                                                           Mc Farlane (81è) pou Trinidad é Tobago.

                                                          Klasman final a gwoup A-la
                                                        1. JAMAYIK 7 pwen (+5)
                                                        2. GRÈNAD 6 pwen (-1)
                                                        3. Trinidad é Tobago 4 pwen (0)
                                                        4. Bawbad 0 pwen (-4)
* Jamayik, Grènad ka kalifyé-yo pou sé dèmifinal-la é pou CONCACAF Gold Cup 2009-la.