Digicel Cup 2008 : Bilan-la

On bèl konpétisyon an Karayib-la é on bèl é gwan venkè, Jamayik. Pa kont asi òganizasyon-la, ni dé biten pou moun wouvwè kon sé téren foutbòl-la. Si ta Kingston oben ta Trelawny té bon mé ta Montego Bay té bòskaf. Boul-la té ka soté asi téren-la. An ka kwè Gwadloup pé li osi òganizé faz final a Digicel-la davwa moun ka mal palé téren é èstad Gwadloup mé lè nou ka vwè sa Jamayik ka bay. Dayè pou pwochen édisyon-la fò Gwadloup prézanté kandidati ay.
Asi sé 8 match-la, yo maké 57 bi é té ni on sèl 0-0 (Gwadloup-Kiba pou 3è plas-la). Jamayik gannyé 4è tit ay (1991,1998,2005,2007). Grènad jwé dézyèm final ay apré 1989. Gwadloup fè menm biten ki an 1994, ki vlé di monté asi podyòm-la. Adan sé dèmifinalis-la, Gwadloup é Kiba té ja adan dènyé karé-la lanné pasé Trinidad. Méyè bitè a Digicel-la (éliminatwa+faz final) sé Roberto Linares (Kiba) èvè 7 bi. Méyè jwè-la sé aryè latéral dwa-la Eric Vernan.
E pou fini Jamayik, Grènad, Gwadloup é Kiba gannyé plas a yo pou CONCACAF Gold Cup a lanné pwochenn.