Gold Cup 2009 : Gwadloup dézyèm !

Gwadloup pa rivé sové prèmyé plas ay adan gwoup C a CONCACAF Gold Cup-la aprédavwa i pèd douvan Mèksik an vil Phoenix. Gerrardo Torrado é Miguel Sabah kyouyé tout lèspwa ba Lagwadloup. Ki fè sé ti-boug Gwada-la kay kontré èvè Kòstarika dézyèm a gwoup B-la an vil Dallas dimanch pwochen an kadèfinal. On ékip Kòstarika ki té ja gannyé nou 1-0 an faz dè poul an 2007. Mèksik li kant ay kay bouwé èvè Ayiti dimanch osi toujou an vil Dallas an kadèfinal. Pa kont sé ké prèmyé fasadaj a yo adan listwa a Gold Cup-la. Panama li osi kay jwé kadèfinal aprédavwa i fouté san pon kalté pwoblèm Nikaragwa 4 bi a 0. On ékip Nikaragwa ki sé ékip pli fèb a konpétisyon-la èvè Grènad. Kon an 2007, Panama kay kontré èvè Etazini adan sé kadèfinal-lasa. E an 2007 Etazini té gannyé 2-1. Etazini - Panama sé ké sanmdi pwochen an vil Philadelphia.

                                                                                     GWOUP C

12/07/09 : an vil Phoenix : Nikaragwa - Panama 0-4
                                        Bi : Blas Perez (35 èm), Gabriel Gomez (56 èm), Luis Tejada (76 èm, 88 èm) pou Panama.

Gòl a Nikaragwa ay èché 4 fwa boul-la
an kan ay.


12/07/09 : an vil Phoenix : Mèksik - Gwadloup 2-0
                                         Bi :  Gerrardo Torrado (42 èm), Miguel Sabah (85 èm) pou Mèksik.

Torrado (a dwat) maké prèmyé bi-la
douvan Gwadloup.

                                                                        Konpozisyon a ékip Gwadloup

                                                                                                16. Fausta

                                                            2. Lina              5. Viator          6. Vertot             15. Comminges

                                                                                                   18. Gamiette

                                                                         21. Fleurival                                          8. Auvray (kap)

                                                        17. Hanany                                                                   19. Gendrey
                                                    (20. Clavier (56 èm))                                                     (13. Lambourde (76 èm))
                                                                                                      11. Antoine-Curier
                                                                                                      (9. Gotin (64 èm))

                                          Karton jòn : Gamiette, Fleurival, Vertot (2 fwa)
                                          Karton wouj : Vertot, Gotin.

* Nou komansé fè bétiz davwa apré Tacalfred, sé Vertot é Gotin ka pwan on karton Wouj. Si pou Vertot sa mwen grav, pa kont on jwè kon Gotin ké manké nou pou kadèfinal-la douvan Kòstarika. Adan klasman a "fair-play"-la, nou dwèt dènyé!

                                                                         
                                                                      
                                                                             Klasman final a gwoup C-la
 
                                                                              1. MÈKSIK 7 pwen (+4)
                                                                              2. GWADLOUP 6 pwen (+1)
                                                                              3. PANAMA 4 pwen (+3)
                                                                              4. Nikaragwa 0 pwen (-8)

. Mèksik, Gwadloup, Panama ka kalifyé-yo pou sé kadèfinal-la.