Mondyal 2010 : sa komansé wouséré!

Mèksik gannyé Etazini on dézyèm fwa
apré final a Gold Cup-la.

Yè éliminatwa a koup di mond-la woudémaré aprédavwa sé péyi a zòn CONCACAF-la fasadé adan Gold Cup-la mwa pasé. E sé kon sa tou sé ékip-la ki té ka wousivwè gannyé match a yo.Trinidad é Tobago woulansé-y aprédavwa i gannyé Salvadò 1-0. Kant a Ondiras, i kochi bèk a Kòstarika 4 bi a 0! Chonjé sé ékip Kòstarika ki té éliminé ékip an nou Gwadloup 5-1 adan kadèfinal a CONCACAF Gold Cup-la. E adan gwan match-la ant Mèksik é Etazini, rèvanch a final a Gold Cup-la, Mèksik gannyé ékip mérikenn-la 2 bi a 1. Sa ka bay adan klasman-la Ondiras ka jwenn Etazini adan dézyèm plas-la èvè 2 pwen rèta dèyè Kòstarika. Mèksik li kant ay ka rété toujou 4èm é Trinidad é Tobago mété-y menm wotè ki Salvadò. Pou lè moman pon ékip poko éliminé! Pwochen jouné-la ka jwé jou 9 sèptanm èvè Kòstarika-Mèksik, Etazini-Salvadò,Ondiras-Trinidad é Tobago.



                                              Eliminatwa a koup di mond 2010 : zòn CONCACAF

12/08/09 : Mèskik - Etazini 2-1
                   Ondiras - Kòstarika 4-0
                   Trinidad é Tobago - Salvadò 1-0

Klasman-la : 1. Kòstarika 12 pwen (0), 2. Ondiras 10 pwen (+4), 3. Etazini 10 pwen (+3), 4. Mèksik 9 pwen (-1),
                         5. Salvadò 5 pwen (-2), 6. Trinidad é Tobago 5 pwen (-4).

                               Pwochen jouné-la  :
9/09/09 : Kòstarika - Mèksik
                 Etazini - Salvadò
                 Ondiras - Trinidad é Tobago