4 juin 2009
4
04
/06
/juin
/2009
14:31
Franck Silvestre ki woulé boul an vant a bèt-la AJ Auxerre, Montpellier é ki jwé ba sélèksyon fwansé adan sé lanné 80-la, fè jibilé ay an péyi a papa-y. Sé kon sa i sanblé tout ansyen foutbalè pwofésyonèl pou yo fasadé èvè ékip nasyonal Gwadloup ki ka paré-y pou Gold Cup-la. Match-lasa fèt yè swa asi èstad René-Serge Nabajoth an vil Zabim. On match yo montré an dirèk asi Canal 10. Douvan 5 000 moun sé ti-boug Gwada-la gannyé 2 bi a 1. Sé matiniké-la Frédéric Piquionne (Olympique Lyonnais) ki maké ba ékip a Franck Silvestre é sé Mathieu Bemba (Ermis Aradippou (Chyp)) é Yannick Darmalingon (Racing Club Bastè) ki ba ékip Gwadloup gannyé. On bèl fasadaj ba sé ti-boug Gwada-la! Jénès kont èspéryans! Natirèlman ni onlo adan yo ki pé ké ay adan CONCACAF Gold Cup-la an mwa juiyé-la ki ka vini padavwa pou ékip nasyonal an nou fè on bon biten adan konpétisyon-lasa fò'y chayé èvè 75% jwè déwò. Nou ka atann fè a chanpyona nasyonal-la é adan dé otwa simenn Roger Salnot sélèksyonnè-la ké ban nou lis a sé jwè-la ki ké fè vwayaj-la pou péyi Etazini.
Gold Cup-la ka démaré jou 3 juiyé pou'y fin jou 26 a menm mwa-la. Lagwadloup ka touvé-y adan gwoup C-la èvè Panama, Nikaragwa é Mèksik. Nou ka démaré dimanch 5 juiyé douvan Panama an vil San Francisco.
Konpozisyon a ékip Gwadloup : Fausta - Delannay, Jérôme, Laurence, Quistin - Nabab, Gomez, Bemba, Hanany - Gotin, Darmalingon.
Jwè ki rantré pannan match-la : Mercury, Vardin, Bématol, Aubatin, Labiche, Michineau.