Gwadloup pa té adan
sa douvan Kanada sanmdi.
Apré match-la yo pèd la douvan Kanada (0-1) sanmdi é aprédavwa Salvadò é Gwatémala gannyé twazyèm match a-yo, sé ti-boug Gwada ni...0,5% chans pou yo pwan chimen a kadèfinal a Gold Cup a CONCACAF-la. Salvadò é Gwatémala èvè 4 pwen pou yo chak, douvan Gwadloup menm si'y té gannyé Etazini jòd-la. Pou Lagwadloup pasé, fò'y konté asi on viktwa a Panama douvan Kanada é fò'y gannyé Etazini èvè plis ki dé bi éka. On misyon pwès enposib!
Sa an pé di ékip nasyonal Gwadloup pasé a koté adan tounwa-lasa. Mèt a mannyòk a foutbòl Gwadloup, ès yo pwan konsyans yo té ni on Gold Cup pou yo paré? An pa'a kwè padavwa a pa èvè on ti-match an kouyonnad Zabim douvan Fort Lauderdale é a pa lè ou ka komansé sanblé sé jwè-la hui jou avan, ou ké fè on biten sèryé adan konpétisyon-lasa.
Wi nou poko éliminé mé nou plis ka pwan chimen a kaz an-nou ki chimen a kadèfinal.
Adan match a vandrèdi, Jamayik konfirmé bon rézilta a prèmyé match a-y douvan Grènad (4-0), i gannyé Gwatémala 2-0. On ékip Jamayik toujou gannyé an Gold Cup. Ondiras li kant a-y, pliché osèryé Grènad 7 bi a 1!! Pou lèmoman sé rèkò a Gold Cup-la. Adan gwoup B-la, Jamayik pwan prèmyé plas-la é ja kalifyé pou sé kadèfinal-la.
Pou match a lèlandèmen sanmdi, apré défèt a Lagwadloup douvan Kanada, on gwo manman sirpriz rivé Tampa Bay. Péyi òganizatè-la, Etazini pèp douvan Panama 1-2. On ékip Panama ki èvè dé viktwa ka kalifyé-y pou sé kadèfinal-la. Sé prèmyé fwa Etazini ka pèd on match dè poul adan on Gold Cup. Tousa apré 26 match! Etazini ké rèvancha douvan nou oswè-la. Désidéman, a pa té lanné an-nou!
Gwoup A-la té ka bout lendi èvè on nouvo viktwa a Mèksik douvan Kòstarika (4-1). Kou-lasa Chicharito pa maké. Rafael Marquez ansyen aryè a FC Barcelone (Espagn) maké prèmyé bi a Mèksik. On ékip Mèksik ki plis ki janmen favori pou viktwa final-la. Salvadò li kant a-y ka plasé-y pou kalifikasyon-la aprédavwa i krazé Kiba 6-1.
Dènyé jouné a gwoup B-la fèt yè, èvè on twazyèm viktwa a Jamayik. Sé "Reggae Boyz"-la gannyé Ondiras 1-0. Jamayik ka bout prèmyé tou-la prèmyé adan gwoup a-y. Gwatémala pa jwenn pon pwoblèm douvan Grènad, i gannyé 4-0.
Sa ki bèl sé vwè on pakèt bi ka fèt adan tounwa-lasa. Edisyon a 2011 ka riské bat rèkò a 2007.
GOLD CUP A CONCACAF AN PEYI ETAZINI
Gwoup B : Miami
10/06/11 : Jamayik - Gwatémala 2-0
Bi : Phillips (66èm, 76èm) pou Jamayik.
Ondiras - Grènad 7-1
Bi : Bengston (26èm, 37èm), Costly (28èm, 67èm, 71èm), W.Martinez (88èm), Meija (90+3èm) pou Ondioras. Murray (20èm) pou Grènad
Klasman-la
1. Jamayik 6 pwen (+6)
2. Ondiras 4 pwen (+6)
3. Gwatémala 1 pwen (-2)
4. Grènad 0 pwen (-10)
* Jamayik ka kalifyé-y pou sé kadèfinal-la.
Gwoup C : Tampa Bay
11/06/11 : Kanada - Gwadloup 1-0
Bi : De Rosario (50èm asi pénalti) pou Kanada
Ekip-la : 1. Grandel - 5. Viator, 3. S. Zubar, 13. Lambourde, 2. Comminges - 12. Gamiette - 6 Fleurival ( 7. Loval (58èm)), 19. Auvray (kap) - 10. Racon (15. Ictoi (65èm)) - 21. Socrier (11. Nabab (73èm)), 18. Jovial.
Antrénè : Roger salnot
11/06/11 : Etazini - Panama 1-2
Bi : Luis Tejada (19èm), Gomèz (36èm asi pénalti) pou Panama.
Goodson (66èm) pou Etazini.
Klasman-la
1. Panama 6 pwen (+2)
2. Etazini 3 pwen (+1)
3. Kanada 3 pwen (-1)
4. Gwadloup 0 pwen (-2)
* Panama ka kalifyé-y pou sé kadèfinal-la.
Gwoup A : Chicago
12/06/11 : Salvadò - Kiba 6-1
Bi : Zelaya (13èm, 71èm), Romero (29èm), Blanco (69èm), Alvarez (84èm), Quintanilla (90+4èm) pou Salvadò. Marquez (83èm) pou Kiba.
12/06/11 : Mèksik - Kòstarika 4-1
Bi : R. Marquèz (17èm), Guardado(19èm, 26èm), Barrera (38èm) pou Mèksik.
Urena (69èm) pou Kòstarika.
Klasman-la
1. MÈKSIK 9 pwen (+13)
2. KÒSTARIKA 4 pwen (+2)
3. Salvadò 4 pwen (0)
4. Kiba 0 pwen (-15)
* Mèksik, Kòstarika ka kalifyé-yo pou sé kadèfinal-la.
Salvadò dwèt atann rézilta a gwoup B é C-la pou'y sav si'y ka kalifyé-y osi.
Gwoup B : Harrison
13/06/11 : Gwatémala - Grènad 4-0
Bi : Del Aguila (16èm), Pappa (22èm), Ruiz (54èm), Gallardo (59èm) pou Gwatémala.
Jamayik - Ondiras 1-0
Bi : Johnson (36èm) pou Jamayik.
Klasman-la
1. JAMAYIK 9 pwen (+7)
2. ONDIRAS 4 pwen (+5)
3. GWATEMALA 4 pwen (+2)
4. Grènad 0 pwen (-14)
* Jamayik, Ondiras, Gwatémala ka kalifyé-yo pou sé kadèfinal-la.
Gwoup C : Kansas City
14/06/11 : Panama - Kanada (7 PM)
Etazini - Gwadloup (9 PM)