An bout a simenn-la, nouvo antrénè a ékip nasyonal Gwadloup, misyé Steeve Bizasène rantré an fonksyon. I sanblé sanmdi jwè asi Ganntè é yè dimanch, jwè asi Bastè. I sanblé plis ki 50 jwè lokal
pou'y komansé vwè ki moun adan yo ké pé pwan plas adan ékip nasyonal-la. On dòt sanblé ké fèt an bout a mwa-lasa é la, misyé Steeve Bizasène ké ni on lidé asi ékip-la i kay mèt an plas.
Lagwadloup tini dé échéyans pou lanné pwochenn. Koup "Digicel" a sé nasyon Karayib-la ola faz final ké jwé an juiyé é koup DOM-TOM ki ké jwé an sèktanm an vant a bèt-la.
Nou sav Steeve Bizasène èvè tout rèstan èstaf tèknik-la ka préparé on sélèksyon osèryé pou Gold Cup a CONCACAF 2013-la.
Dayè jou sanmdi 12 novanm, sé ti-boug Gwada-la kay fasadé èvè ékip nasyonal Mali adan on match zanmi ki kay jwé adan èstad La courneuve Paris. On ékip Mali ki ni adan-y Frédéric
kanouté avan a FC Seville (Èspagn) é Seydou Keita dèmi a FC Barcelone (Èspagn). On ékip Mali ki kalifyé pou koup a sé nasyon afwikenn-la ki kay jwé lanné pwochenn an
péyi Gabon é an péyi Giné Ekwatoryal. Gwadloup-Mali, on match nou pa dwèt manké an pon jan!
Sa
fèt! Jòd-la, Lig Foutbòl Gwadloup (LGF) nonmé nouvo sélèksyonnè a ékip nasyonal Gwadloup. Non a-y Steeve Bizasène. I ka pwan plas a Roger Salnot. Steeve Bizacène ansyen jwè a CSM é ansyen
entènasyonal gwadloupéyen (i té jwé Digicel a Karayib-la an 2007). Lanné-lasa i té menné ékip jinyò a Lagwadloup adan tounwa kalifikatif pou koup di mond-la an péyi Gwatémala.
An nou èspéré èvè misyé Bizasène, kouran-la ké pasé myé èvè sé jwè pwo-la, ké tini on méyè disiplin é piplis nou gannyé bon rézilta.
Lig Foutbòl Gwadloup(LGF) ni on tou a 400 000 éwo é moné padavwa onlo klèb Gwadloup an défisit. Ki fè misyé Guy Roch ki sé mèt a mannyòk a LGF-la désidé klèb ka douwé Lig
Foutbòl Gwadloup pé ké jwé chanpyona.
Alò konmen klèb nou ké touvé adan chanpyona nasyonal-la? Dis, Huit, sis? Nou ké la pou nou vwè.
Aprédavwa Gwadloup manké Gold Cup a-y, prézidan a Lig Foutbòl Gwadloup
désidé fò sélèksyon-la chanjé antrénè. Misyé Wojé Salnot té an tèt a sélèksyon dèpi 2001. I menné ékip nasyonal Gwadloup an dèmifinal a Gold a CONCACAF-la an 2007 é an kadèfinal a menm
konpétisyon-la an 2009. I menné osi Lagwadloup an final a koup Digicel Karayib-la an 2010 Matnik. Malérèzman i échwé an 2011 pou Gold Cup-la. Misyé Wojé Salnot té ja anonsé Gold Cup-lasa té ké
dènyé ripaj a-y. Echèk a Lagwadloup akséléré mouvman-la. Alò ki moun pou pwan suit a Salnot an tèt a ékip nasyonal Gwadloup? Moun ka anonsé ajwen a-y Jocelyn Angloma, dòt ka anonsé antrénè a CSM
misyé Richa Albert. Jis a jòdi-jou, nou poko savé.
Ekip nastyonal Mèksik kochi ankò on fwa bèk a sé mériken-la. Apré on 5-0 an 2009, Mèksik gannyé final a édisyon 2011-la 4-2 an vil Los Angeles. Tousa èvè on bèl bi a Jiovanni Dos Santos.
Sé sizyèm fwa Mèksik ka ralé Gold Cup-la. I ka kalifyé-y pou pwochen koup a sé konfédérasyon-la ki kay jwé an 2013 an péyi Brézil.
GOLD CUP A CONCACAF AN PEYI ETAZINI
FINAL-LA :
25/06/07 : Adan èstad Pasadena (Los Angeles) :
Etazini - Mèksik 2-4
Bi : Bradley (8èm), Donovan (23èm) pou Etazini. Barrera (29èm, 50èm), Guardado (36èm), Dos Santos (76èm) pou Mèksik.
* Mèksik chanpyon a laCONCACAF 2011 é ka kalifyé-y pou koup a sé konfédérasyon 2013 an péyi Brézil.
Javier "Chicharito" Hernandez (Mèksik) ka bout méyè bitè a Gold Cup-la èvè 7 bi é an menm balan-la éli méyè jwè a konpétisyon-la.
Klasman a sé nasyon-la : 1. Mèksik, 2 Etazini, 3. Panama, 4. Ondiras, 5.Jamayik, 6. Kòstarika, 7. Salvadò, 8. Gwatémala,
9 Kanada, 10. Gwadloup, 11. Grènad, 12. Kiba.
Mèksik - Etazini, sé ké senkyèm fwa yo kay fasadé an final. Mèksik gannyé twa! Dènyé fwa sété an 2009, Mèksik té krazé Etazini...5-0! Alò Mèksik ké favori pou final a dèmen sanmdi an vil Los
Angeles. Jwè klé a Mèksik sé ké natirèlman Javier "Chicharito" Hernadez ki méyè bitè a tounwa-la èvè 7 bi. Ta ékip nasyonal Etazini ké Clint Dempsey ki ja maké twa bi é ki té désizif douvan
Jamayik an kadèfinal é Panama an dèmifinal. Jwé boul a-zòt!
Aryè a ékip nasyonal Kòstarika, misyé Dennis Marshall touvé lanmò adan on aksidan loto asi réjyon a San José ki sé kapital a Kòstarika. I té èvè kopin a-y lè loto a-y la fè on aksidan, yo toulédé
mò!
Dennis Marshall té adan ékip kòstarika ki jwé Gold Cup-la an péyi Etazini. I té jous maké douvan Ondiras an kadèfinal (1-1 apré pwol. (2 pénalti a 4).
Lavi sé kon sa'y yé! Pon moun pa sav ki tan yo ké pati!
Fò nou té atann-nou a sa! Aprédavwa ékip nasyonal Gwadloup raté tounwa a-y an péyi Etazini (3 défèt é éliminasyon an prèmyé tou-la), i pèd douz plas adan klasman mondyal-la. I ka touvé-y 93èm
dèyè ékip kon Létoni, Trinidad, Angola é douvan Aljéri, Barenn, Emira Arab ini. On klasman ki pa lwen ta laFIFA. Si Lagwadloup té adan laFIFA, i té ké adan sé zòn-lasa.
Gwadloup osi twazyèm nasyon a Karayib-la dèyè Jamayik é Trinidad.
Jòd-la dèmifinal a Gold Cup a CONCACAF ké bay alé an vil Houston ola Etazini kay éséyé pwan rèvanch a-y anlè Panama é Mèksik ké fasadé èvè Ondiras. Ès nou ké ni on final ankò on fwa antrè Mèksik
é Etazini? Padavwa dé dènyé final-la fèt antrè sé dé ékip-lasa. An 2007 Chicago, Etazini té gannyé Mèksik 2-1 é an 2009 New-York, Mèksik té pwan rèvanch a-y, i té pliché ékip mériken-la 5-0! Mé
Panama é Ondiras poko di dènyé mo a-yo. Panama té ba Etazini prèmyé défèt a-y adan on match dè poul apré 26 match. Sa té fèt an vil Tampa Bay ola Panama té gannyé 2-1. Onidras li kant a-y té
kochi bèk a Mèksik an 2007, i té gannyé-y 2 bi a 1. Etazini é Mèksik ni favè a sé pwonòstik-la mé an foutbòl ayen pa senten!