Boul an Karayib-la

Marius Fausta gòl a Evolikas Ti-bou fè nou obliyé Franck Grandel adan CONCACAF Gold Cup-la. Sé vré nou pa menm rann-nou kont kè Grandel pa té la! Fausta  désidé arété jwé boul. Gold Cup-la sé té dènyé konpétisyon ofisyèl ay. Marius Fausta ki konnèt prèmyé sélèksyon ay on  jou 10 mas 1999 douvan Domnik adan Koup a sé nasyon Karayib-la. 23 sélèksyon ka kouronné on bèl karyè a foutbalè. Li èvè Fabrice Mercury a CSM, sé méyè gòl a chanpyona nasyonal an nou. Fausta chanpyon Gwadloup lanné pasé é twazyèm lanné-lasa èvè klèb ay Evolikas, té jous anonsé i té ka arèsté karyè ay avan Gold Cup-la. Mé konm Dijon pa lésé Grandel ay jwé Gold Cup-la é konm Mercury touvé-y blésé, ékip nasyonal Gwadloup té adan on pwoblèm a gòl. Ki fè Fausta té oblijé wouvin an sélèksyon. E i byen fèt padavwa douvan Panama i fè on bèl match toubòlman. Tèlman i té bon, yo éli-y méyè jwè a match-la. Si Gwadloup rivé an kadèfinal, Fausta jwé on gwan wòl adan rézilta a ékip-la. Douvan Panama, Nikaragwa, Mèksik é Kòstarika misyé arété bon chout a sé avan-la. Mé malérèzman i pa anpéché Lagwadloup koulé douvan Kòstarika (1-5). A pa té fòt ay! Sé plito aks santral-la ki pa té asiré an match-la. Cédric  Avinel é Eddy Viator pa té a lawotè douvan Kòstarika. Ankò on fwa on bèl woulo ba Marius Fausta.


Marius Fausta douvan Panama adan Gold Cup-la


                                                                  Mi karyè ay an sélèksyon :

23 sélèksyon an ékip nasyonal Gwadloup.
10/03/99 : Gwadloup - Domnik 1-0 (Koup Karayib)
12/03/99 : Gwadloup - Antig é Bawbouda 2-1 (Koup Karayib)
14/03/99 : Gwadloup - Bawbad 1-0 (Koup Karayib)
24/11/06 : Gwadloup - Sendomeng 3-0 (Digicel Cup)
26/11/06 : Gwiyana - Gwadloup 3-2 (Digicel Cup)
28/11/06 : Gwadloup - Antig é Bawbouda 3-1 (Digicel Cup)
24/03/07 : Gwadloup - Trinidad é Tobago 2-2 (Match zanmi)
17/05/07 : Gwadloup - Domnik 2-0 (Match zanmi)
20/05/07 : Gwadloup - Domnik 1-1 (Match zanmi)
14/11/07 : Gwiyàn - Gwadloup 2-3 (Match zanmi)
21/12/07 : Gwadloup - Gwiyàn 1-1 (Match zanmi)
18/01/08 : Domnik - Gwadloup 0-3 (Match zanmi)
06/02/08 : Trinidad é Tobago - Gwadloup 0-0 (Match zanmi)
29/02/09 : Gwadloup - Senvensan é Grenadin 1-2 (Match zanmi)
24/09/08 : Matnik - Gwadloup 1-0 (Koup DOM-TOM)
27/09/08 : Gwadloup - Kanaky 4-0 (Koup DOM-TOM)
30/09/08 : Gwadloup - Tahiti 1-0 (Koup DOM-TOM)
03/10/08 : Gwadloup - Gwiyàn 4-0 (Koup DOM-TOM)
11/10/08 : Gwadloup - Zil Kayiman 7-1 (Digicel Cup)
05/07/09 : Gwadloup - Panama 2-1 (Gold Cup)
09/07/09 : Gwadloup - Nikaragwa 2-0 (Gold Cup)
12/07/09 : Mèksik - Gwadloup 2-0 (Gold Cup)
19/07/09 : Kòstarika - Gwadloup 5-1 (Gold Cup)

Etazini - Ondiras é Mèksik - Kòstarika sé ké afich a dèmifinal a CONCACAF Gold Cup 2009-la. Lé 4 méyè a zòn CONCACAF-la kay goumé pou tit siprèm-la. Etazini té ja bouwé èvè Ondiras an faz dè poul-la adan prèmyé tou-la. Sé té an vil Washington otila Etazini té gannyé 2-0. Sa kay fè senkyèm kontré a yo adan Gold Cup-la. Etazini gannyé-y 3 fwa é té fè bita-bita èvè-y an 1991 (0-0). Mèksik li kant ay ké éséyé gannyé plas ay an final-la pou sizyèm fwa ay douvan Kòstarika. Mèksik é Kòstarika té ja kontré yo an kadèfinal an 2007. On match ki té rèd toubòlman èvè 3 jwè a Kòstarika ki té pwan on karton wouj. Mèksik té gannyé match-la 1-0 apré pwolongasyon gras a Jared Borgetti.

                                                                             Jédi 23 juiyé
                                                                          (An vil Chicago)

A 7 è di swè (*)

                           
       ETAZINI                                                  ONDIRAS

Fasadaj adan Gold Cup-la
1991 : Etazini - Ondiras 0-0
1993 : Etazini - Ondiras 1-0
2005 : Etazini - Ondiras 2-1
2009 : Etazini - Ondiras 2-0

A 10 è di swè (*)

                             
        MÈKSIK                                                KÒSTARIKA

Fasadaj adan Gold Cup-la
1991 : Mèksik - Kòstarika 2-0
1993 : Mèksik - Kòstarika 1-1
2003 : Mèksik - Kòstarika 2-0
2007 : Mèksik - Kòstarika 1-0

(*) Pou zò tini lè Gwadloup fò zò mété on lè an plis.
                  

Dèmifinalis an 2007, kadèfinalis lanné-lasa, ékip nasyonal Gwadloup
plis ki janmen adan lé méyè ékip a CONCACAF-la.


4 match jwé, dé viktwa, dé match-pèd. 5 bi maké kont 8 bi pwan. Pou dézyèm vini ay adan CONCACAF Gold Cup-la, ékip nasyonal Gwadloup rivé an kadèfinal. Sé vré i fè mwen byen ki an 2007 mé èvè ékip-la i té tini la fò pa nou té atann on méyè rézilta. Èvè on préparasyon ki kontré pwoblèm, èvè on ékip B, rivé an kadèfinal sé plito on bèl rézilta. Ay gannyé Panama, ékip chanpyon Lamérik Santral-la té on bèl sirpriz ban nou é apré nou konfiwmé lè nou gannyé Nikaragwa. Dé match gannyé é nou té ja kalifyé pou sé kadèfinal-la. Pou dènyé match a poul an nou douvan Mèksik, nou lésé jwè kon Aurélien Capoue, Loïc Loval, Cédric Avinel rèpozé-yo. Mèksik ki té oblijé gannyé pou'y pa fin dézyèm mèt an wout asi nou é sé kon sa i gannyé nou 2 bi a 0 menm si nou bouskilé sé mèksiken-la ti-bwen an fen a match-la. Finalman nou fin dézyèm pou nou bouwé èvè on gwo mòso a CONCACAF-la Kòstarika. Alò kè Mèksik li té kay fasadé èvè Ayiti. Sé vré si fò nou té chwazi, nou té ké préféré kontré èvè Ayiti mé pou sa fò nou té gannyé poul an nou. Nou fin dézyèm alò sé ké kòstarika. On simenn pasé san match avan sé kadèfinal-la. Ès sé pou sa sé ti-boug Gwada-la pa rantré an match-la dimanch? E poutan Kòstarika té tini plis jou rèpo ki nou ankò. Yo pa kontré pon pwoblèm a ritm. Yo maké gwan bonnè anlè nou. Prèmyé bi-la adan 3 èm minit-la é dézyèm-la 13 minit apré. Ki fè apré 16 minit foutbòl, Kòstarika té ja ka menné 2-0. Mi klé a match-la! An 2007, apré 28 minit jé, Gwadloup té ka menné 2-0 anlè Ondiras. Jwè Ondiras pa jen woulévé apré. Sé sa ki rivé nou dimanch. Gwan bonnè Kòstarika maké é sé sa ki kasé zèl an nou. An nou imajiné si sé té Gwadloup ki té maké an prèmyé, sé té ké on dòt match. Konm an plis di sa, té ka manké yonn dé moun sèryé an milyé-la David Fleurival alò sa pétèt jwé osi asi rézilta-la é sitou asi èskò-la. Finalman Kòstarika gannyé 5 bi a 1. Pli lou match-pèd an nou adan on Gold Cup.Nou té vrèman limité adan konpétisyon-lasa.Nou ka èspéré kè sa ké sèvi nou lèson pou Gold Cup 2011-la a kondisyon nou kalifyé. Pou kalifyé-nou pou Gold cup an pa pè padavwa Gwadloup montré i ni on gwo ékip adan Karayib-la.

                                                                    Match a Lagwadloup

                                                                    1 é tou : Gwoup C

05/07/09 : an vil San Francisco : Gwadloup - Panama 2-1
                                        Bi : Loïc Loval, David Fleurival

09/07/09 : an vil Houston : Gwadloup - Nikaragwa 2-0
                                         Bi : Stéphane Auvray, Ludovic Gotin

12/07/09 : an vil Phoenix : Mèksik - Gwadloup 2-0

* Gwadloup dézyèm adan poul ay

                                                                             Kadèfinal

19/07/09 : an vil dallas : Kòstarika - Gwadloup 5-1
                                    Bi : Alexandre Alphonse.

                                                                        Bilan a sé 23 gwadloupéyen-la

1. Yohann Bus (gòl) : 0 match
2. Meddy Lina (aryè) : 1 match
3. Michaël Tacalfred (aryè) : 3 match
4. Cédric Avinel (aryè) : 3 match
5. Eddy Viator (aryè) : 4 match
6. Alain vertot (aryè) : 3 match
7. Loïc Loval (avan) : 3 match, 1 bi
8. Stéphane Auvray (milyé) : 4 match, 1 bi
9. Ludovic Gotin (avan) : 2 match, 1 bi.
10. Aurélien Capoue (avan) : 3 match
11. Michaël Antoine-Curier (avan) : 3 match
12. David Fleurival (milyé) : 3 match, 1 bi
13. Jean-Luc Lambourde (milyé) : 3 match
14. Willy Laurence (aryè) : 0 match
15. Miguel Comminges (aryè) : 4 match
16. Marius Fausta (gòl) : 4 match
17. Lerry Hanany (milyé) : 1 match
18. Thomas Gamiette (milyé) : 4 match
19. Grégory Gendrey (milyé) : 3 match
20. Larry Clavier (avan) : 3 match
21. Fabien Jérôme (aryè) : 0 match
22. Alexandre Alphonse (avan) : 3 match, 1 bi
23. Cédric Céligny (gòl) : 0 match.

Jou 18 juiyé adan èstad a vil Dallas, Gwadloup kay éséyé maké on dòt paj a listwa ay douvan Kòstarika an kadèfinal a CONCACAF Gold Cup-la. Dé lanné apré lèsplwa ay douvan Ondiras (2-1), sé ti-boug Gwada-la kay vwè si yo ka pwan chimen a dèmifinal. Mé Kòstarika sé on ékip ki rèd toubòlman! Nonsèlman yo ka jwé boul mé an plis di sa yo ka pwovoké moun. Nou ja kontré-yo an match dè poul an Gold Cup 2007-la. Jou-lasa, awbit-la té sòti onlo karton jòn. 6 adan total-la. 4 ba Kòstarika é 2 ba Lagwadloup. On mirak si jou-lasa pa té ni karton wouj. E sé pou sa fò pa sé ti-boug Gwada-la tonbé anba zatrap a jwè Kòstarika davwa menm si nou kalifyé, ké riské manké nou jwè enpòtan pou dèmifinal-la. On dèmifinal nou ké jwé kont léfwè ayisyen? Sé té ké on bèl biten pou Karayib-la mé avan sa fò Ayiti débarasé-y dè on gwo mòso. Non ay Mèksik. On ékip ki gannyé 4 fwa Gold Cup é ki té finalis an 2007. Fò Ayiti fè on bèl é gwan match si'y vlé èspéré kalifyé-y pou dèmifinal-la. Jòd-la, kay jwé an vil Philadelphia, lé dé prèmyé kadèfinal. Kanada-Ondiras é Etazini-Panama. Dé bèl afich osi. On léjé avantaj ba Kanada é Etazini natirèlman favori douvan Panama. Mé tansyon sirpriz pé rivé fèt! Lojik-la té vlé nou tini an dèmifinal, Etazini-Kanada é Mèksik-Kòstarika mé mwen an pa dakò! Randévou lendi pou dékatman a tout sé rézilta-la!

                                                                         GWADLOUP / KÒSTARIKA


Gwadloup kay pwan chimen
a dèmifinal kon an 2007?

                                                                         Konpozisyon a ékip Gwadloup
                                                                              (Pwonòstik an mwen)

                                                                                         16. Fausta

                                                       3. Tacalfred       5. Viator       4. Avinel            15. Comminges

                                                                                             18. Gamiette

                                                                       20. Clavier                              8. Auvray (kap)

                                                         7. Loval                                                                 10. Capoue

                                                                                              11. Antoine-Curier

                           Sé ranplasan-la : 1. Bus, 2. Lina, 14. Laurence, 13. Lambourde, 17. Hanany, 19. Gendrey
                                                            22. Alphonse.

                           Jwè ki pa adan fèy dè match-la : 23. Céligny, 6. Vertot (pwan on match sispansyon), 21. Jérôme (blésé
                                                                                      pou tout rèstan konpétisyon-la), 12. Fleurival (pati ay jwenn klèb ay
                                                                                       Châteauroux an fwans), 9. Gotin (pwan on match sispansyon).

                                                                   

       
David Fleurival (Gwadloup) é
Charlie Davies (Etazini) té oblijé
lésé ékip a yo pou klèb a yo an
Ewòp.

Match a sé ti-boug Gwada-la douvan Kòstarika dimanch ka vini la ké fèt san milyé défansif-la David Fleurival. Pou ki? Sé padavwa nouvo klèb ay Châtearoux kriyé-y pou rèpriz a antrènman-la. Ki fè dèpi lendi i pati pou jwenn klèb ay an Fwans. Fleurival pa sèl jwè-la ki lagé Gold Cup-la. Zò ni jwè mériken kon Steve Cherundolo, Michael Parkhurst,  Benny Feilhaber, Freddy Addu é Charlie Davies ki pati osi jwenn klèb a yo an Ewòp. Sé vré konpétisyon-lasa mal plasé mé pa rapòt a koup konfédérasyon-la ki té fèt mwa pasé an péyi Afwik di Sid, yo té oblijé fè Gold Cup-la an juiyé. Sa domaj mé fò pa nou obliyé on konpétisyon ka gannyé èvè 23 jwè! Pa kont Gold Cup 2011 ké jwé an jen avan Copa America-la ki ké fèt li an juiyé.